Domin

Domin fine arivé mon frèr

Domin fine désot talèr

Somanké ou wa pa li ankor

Sanm out kanèt bandé sou lasann iyèr

Domin lé la

Lanspèk dovan out port, si out péron d’kaz

Fané dann out bal dori sinkilo lavaz

Kador

Koman drozofilya dan rin gouyav, i dor

Somanké ou koné pa galabé son kayout

Son lodèr zakawèl

Roulé dann pousir larourout

Mé kisa va di aou an kapital, sa domin

Wa tant pou arkilé si ou té koné

Non va, sa i vyin bout par bout, par tibout

Koman tété lodkolonÿ in manmzèl

I drés dovan out bous, pou fé bav out lâm kondané

Domin lé la

Karapat anfoutan si dolo lé klèr

Bourèr kann an foutor si méné ankor vèr

Gard koman dofé pou bril lapo out péyi si son longèr lokor

Gèt koman Domoun i viv an misouk

Wa di sa fofilèr lonbraz dann somin barbélé lagèr

Somanké ou vé pa war

Akoz i tir pa laglas dovan Narsis i pinÿ sové tout lazourné

Akoz out vant lafin pou kronm larzan koman korné pistas doré

Domin lé la, kouvé kouvépa !

Grafinaz si out paz i défil dovan lékol

Galfinaz si out filé bib (blé-Zikbèr), snapèr, skrolèr grokèr

Mé na konbyin domin dovan la krwazé out kèr ?

Gèt koman liv lao la i débord sanm zimaz an parabol pou fandiy koko

Kiswa Siloé sansa Bartimé Zériko

Pou mwin domin, sa in nasyon i vé lévé, kinm ou la koup son zaré

Sa tangaz pou savir lamor dann tiyo léspri avizé

Sa révolisyon-bé i ginÿ arpa anparé, akoz astèr ni koné

In léskiz, in pardon ou pa kab tiré

(BG-2018-01-05)