Lamontrèr

...

Na d’lèr ou krwaz

Ou koné pa kosa ou krwaz

Kiswa lavi, kiswa lamor

Ou koné pa, ou krwaz

Na d’fwa ou krwaz

Domoun i koz, domoun i ri

Ou twaz, ou toy, ou may, ou partaz, ou done, ou gaskone

Ou koné pa pou kosa ou lé la, pou kosa tousala

Na d’fwa ou vèy, na d’fwa ou agard

Na d’fwa ou louksir, ou wa, san konprann
 Na d’fwa ou atann, ou aspèr, san fégard
 Na d’fwa, sa laminm-minm ou aprann

É là, kèkfwa, ou asiz
 É là, kétfwa, ou plèr !

…

Adyé Franswa

Laklos lao, la déboul ankor, pou savir zarlor latèr

Ni yanbou pi, tousa gro-pléré pou dévid nout kor
 

Fane ankor, tan'k ou pé, bann fantézi kador

Fofil dann somin d'rèv, par déryèr fénwar

Pou ni akokine lékrikoz nout fonnkèr

Pou tiktak nout langpozé, lantrorokoz-la

Kinm bouzaron an doulèr, nou larg arpa méné lang-la

Na fénésans, tanpirkipé, pou lèv zélèv an lamontrèr

Pou anravine sobatkoz-la sanm mo-batar

Pou ankikine mo-balo-la, pou an-youliz mo-mangalor

Lansiv Bondyé la rézone ankor, si ranpar boranbor

Péyi Simandèf, zétwal Matouta, sanm Kèr-Eva lé koté ou astèr

Adyé Franswa

…

(BG-2014-06-12/Margot-2020-08-02/Pou Franswa Sintomèr)