Out Péyi Osi

Kisa té koné pa Pir

Aou fonnkézèr la tonm dann Maloya Péyi-la, in zour

Koman zwazo la désot labann

Papiyon la dévir lamèr, blé, koman out zyé gansé

Salvèrt mon Ravan’ dan Fonnbak i rézone gabyé out lang kozé

Pou fé lamour sanm mon Liberté Saliminé

Pa bézwin zimèl pou fé monmon sanm papa

Zis in manir war dovan, akoz domin nou té koné pa !

Rok, Blouz, Zaz aou, koman zawzo-blé dann foré Tapkal aswar

Mon léspri i vavang lari-d’Nis, ousa léskalyé i poz an tapénak avizé

M’i san ankor kèlkèl lansan, zamal mon kotri sou latrans

Lodèr sinbal Bigoun dann bin lamour, Persé pou Ti-Galé.., tousala moun-gabyé

Ziskakan, ki té koné ?

Lopor na trwa bor mon kapitinn, kikswa kikoté oulé

Lafénèt oron, koman lafimé léfé, la pou rouv paviyon lokèr pou Batofou

I tat fénwar, i souk kouran, i rod lanbordir lakot, koté Sinpir, pou roankosté

Lofar aswar koman fanal i klèr pou ou si ranpar filao, astèr

Na d’moun i blouz, i kraz pilon, i mazine sarman Papa Bondyé, lao

Lao, somin kontour la pik dann fon grantans, la désot lalïng syanba

Koman sovsouri astèr ni rod, napi radar Makara pou alime lokèr kap Manapani

Out péyi osi..

(2018-01-20-Pou Pir - Pierre Macquard)