Mon Péyi



M'i wa mon péyi dobout..

Tousa laravine dann ranpar, sa lovinn pou saroy lasèv paranpar

Kiswa lavil, sansa lilèt lao

M'i wa mon péyi sarzé lamour, koman sézon désanm..

Ousa mang, létsi, flanbwayan i pèt an flèr

Pou débord an karo si santyé lakaz, si péron bazar

M'i wa mon péyi palanké dann in bouyon zistwar..

Koman kanot toulézour dann kré lamèr

M’i vèy so larmé fanal fané sou Véli, somanké tramay la, inn sé zour

M’i wa mon péyi dann rir mon dada-bé.. Dann liv lamontrèr, kiswa kolonizatèr, sansa fonnkézèr

M’i wa mon péyi angansé lamodèrnité, li pou dyak lasosyété M’i wa mon péyi aznou, pliyé dovan tout son Bondyé.. Gro-pléré dovan son fwayé, ousa lafimé la kour gran-brilé M’i wa mon péyi asiz, akoz ponso lé kouvèr sanm kouran lé for

M’i wa mon péyi koman in Moun..

Dopi batan-d’pyé, ziska piton léspri

#Lao #Vanglao

26 vues0 commentaire

Posts récents

Voir tout

Sitanksa