Si m'i lé la, konm izé,
Si mon léspri po divagé,
Lès amwin la,
Laminm,
Sanm lamour la, kaskasé..
Sa bal la, sa mon kozé
Bil, yaprop fonnkézé,
Sak aou,
Sak ali,
Sak amwin..
Mon gaté, kikilé
Tiktik anbor,
Yanpar lanwit,
I kont lozour ?
Sa Karousèl oki, sa mon kor !
Tanto Sinn-Ni,
Tanto Lo-Por !
Sa fine dans dann lapousir,
Dann vant labou, dann kwin malèr,
Kanminm sa, i lèv an pyé fouzèr !
(Tourné-viré, viré-tourné)
Fonzon i bwar
Tout sak m'i plèr !
Mon gaté, koukilé,
Kriké !
Soubik annik ?
Kraké !
Sa l’ki marmit galfaté,
Sa mon kor,
Tanto zako, tanto zakor !
Sa i tyinbo dobout,
I tyinbo ankor,
Po gèt santim na logou lor !
(Fèytol solèy angiz lamour ? )
Kit-ta-bwèt !
(Dann mon vant vid lavi lé lour !)
Sa fine manz tanbav latèr,
Patat dolo,
Galé lamèr,
Sa la bwar lozi amèr,
Transpirasyon
Binÿman lokèr !
(Souké largé ? Souk-souké !)
Mon gaté.. Kinm kaskasé,
Pliyé andé, ma kontinyé
Rod in riyèl
Pou nou sové,
Rod in siyèl pou nou déliré..
Mé konbyin somin, konbyin détour
Zot va trapé
Sakinn zot tour ?
In gine réspé
Takon d’foutor...
Na fout pid’plas ou k’zot i dor !!!
Toutfason na gardyin déor,
S’gran kaz
Ou k’kourandèr lé for !
Na vèy azot tyinbo lamour
Dann gétali
Si l’bor lakour..
Episa,
Afors dor dann lapousir,
Dann vant labou,
Dann kwin malèr,
Na lèv konm zot fouzèr fonzon i pous
Pou mont anlèr !
Episa,
Afors manz tanbav latèr,
Patat dolo,
Galé lamèr,
Na flétri konm kapilèr
Dolo pa niyabou mouy lo kèr !
(Siko kolé, koko sikré..., M’man-Sizèl, kélèr ilé ?)
B. GRONDIN (1988-06-01/Margot 2006-06-14)
Comentarios