Pou komansman, i fo m’i mèt lanbordir :

Dabor-inn, dé dat : Trann-sis, sanm Karann-dé

Épi, fo m’i poz dé souvnans : Karo-kann Dyoré, sanm lékol-Limakilé

Sanmsa, fo di azot navé dé somin :

In kaz boukan fas simétir Sinn-Ni

Èpisa laryèl Manyan dann Kan-Bitor

Aprésa, fo zot i koné fontinn dolo té dann lakrwazé, sé-la zot kèr la désoté :

Sak Mimi, sak aou Sak Bébé, sak ali

Pou fini, fo in sor :

In kok an kado pou béni lé dé dovan mwa d’désanm si lotèl Sin-Zak.

« .. »

Ala ou-la…, Ou lé la !

Diz-nèvan !

Fanm-kalou, fanm-lamour, fanm-Anne, pou défane moulal lakaz son dada Gabi Fanm maoul, zoli-fanm pou anbéli lao, pou désot sanm li somin mamzélé Fanm fonnkèr si ranpar Salazi, fanm dobout pou très in zistwar na pwin lobout Sanm in saplé zazakèl somanké, in tralé logrin, dann kèr Bondyé, sof koman wa fé..

Ala ou-la…, Ou té la !

Vintan !

Lasanm-la té fine konèt lanbéli dépi mwa d’Oût Kinm son min lakros té zis bon manyé karès si tryèl Sézéform Kinm out kèr lavinèz té zis préparé pou sonÿ marmit Dann koko zinnzan na touzour lamalis an karo pou délas lokor pliyé

Épi, Bondyé i fane touzour in gïne toupé dann ti-sopine si bifé

La, li té kador pou anpar aou, son véli-katrèr… La, ou té zakor pou fanafout son kor, fé flanm son zéklèr

Karantéin !

Promyé niméro lakaz, par-anö Sodron In somin blaké, paré sanm galé, bordé sipré, sanm karo Böinya

In kaz Lasid, pou ou, pou li, in ki-babouk san loplan, fout pi kap zordi di mon zanfan ki fouti té lé sitantèlman banna la séré

Carpaye, Grondin, Mahavande, Ringuin, Jacques, Servantes… Sakinn son kotri, son park poul, sakinn in kour bordé pyondinn Sakinn son zardin garni boutèy, son karo bétèl, son touf yapana, son manzé-kasi

Kwé té pli gayar kin kwizine dobwa dan lakour, in bak lasann i débord Kwé té pli gayar in kabiné lashinn, sanm dolo pandiyé pou dégalfat lobor Kwé té pli gayar in ros pou lavé sou pyé kasya, in tonèl shoushou, in vèspa In park pizon, in garinn lapin, in pyé miryé, in touf fig pou sigid lavi sévé zot bann éné..

Ala ou-la dann swasann-dé

Fanm an doulèr, sou lamin Doktèr, démayèr zonbri kéli Fanm fyèr son larzèr, kinm lapèr, i fé pous lavi dann tablisman ri d’Pari Dann in soulazman d’kor, pou lo non-di-pèr, pou Lavirz-Mari Dézyinm kado out kèr pou li…

Fine lèr pou angant lakaz, pou di lizorèl fo mèt lapoz Fine lèr pou Mémé ni abit-la, lakour lé gran, lokèr i débord Lapa dé fèy-tol, dé klou, sanm dé kou d’rabo i sora kapab fé langi lotan, fé pèr ali Fine lèr pou drès drwat, pou lav pikèt, pou done tété

Lèr pou saroy out zékli lamour dann boranbor ou-lé Lèr kraz son manzé, akoz mon dada paré pou éné dann out kor ankor fré Aou fanm obout, fanm dobout, fanm kayout pou fénésans dann li latol

Swasant-trwa !

Fanm-saz-la dan lakaz-la astèr, son min bèrso apropté dann lo bandez Pou binÿ Ti-kok ou la poz tousèl dann twal-ékri, an garnitir brodé lavi Innot zanfan Mari, innot bonèr Trwazyinm kado pou ou, pou li..

Swasant-katorz !

Sink gran valal astèr, dé p’ti dèrnyé, pou fé sèt, inn toulézan Sa té pa maléré sor, si Bondyé la doné sé k’ou té kapab vèyé

Marmay rant !! Zot i wa pa latit-brine pou désann, papa palwin arivé-la Misèl, alé trap in pé pétrol pou lalimir Zizèl, ramas mon linz déor, tansyon movézâm.. É zot-la, rès azot in pé trankil, momon fine fatigé, mémé lapou somèy Kisa lapankor lav lopyé ?

Lamour kinm té for, kètfwa té soubat sanm laraz pou nyabou verni lavi Karné krédi-la bagoulé sanm kanèt anbwa zangazé Sinwa Dolé PMI, sanm détrwa kozman lasistans pou nyabou ral obout Dopin sindou, pou kataplas bouzaron vid, kinm inbout Lapoud DTT pou tant défiyantiz lakrout boubou gran-galo dann kou

Bononm i travay, ou koné, i souplinÿ pa ladsi, kinmsa damzane lorom-la lé an touloubon dann son kor godonÿé sanm siman lasoufrans Misyé Zazak ..

Aou, fanm kouraz, fanm batay, fanm vayan, pou fé lédikasyon sizan :

Napwin mo sal dann kozriI mèt pa lopyè si géridonI mèt pa lamin déryèr latétI plèr pa dovan zanfanI kour pa dovan lélanI mont pa lodwa Bondyé lasapèl

Swasant-Disètan astèr

Dann out kor tasé, ranpli tousa sézon lapli konm botan Ala ou-la, dobout anflès dovan lavi, kinmsa kantité larme zonyon, sansa piman la ni rasé Ala ou-la, pou domann romèrsiman Bondyé, kinmsa souvan-défwa ou mazine gran-gaté out ravine, Bébé li la ramasé

Ala ou-la, dovan tousa somanké ..

Dann out karo béton pandiyé, out blok W, pou ansèr anou, sèt Valal-la, i fé plèr aou tanto si lavi, tanto si zoryé.., akoz nout movéfon défwa, nout manir déyémé kétfwa…

Ala ou-la anmayé lamour dann nout léspri zourazour, ousa m’i koné nora pwin d’romans, ni bouké flèr pou ginÿ dir aou pli for fonnkozé-bé-la, sak nou nana pou ou, aou, sanm ali !

« … »

(lao-2013-05-26-Pou Mimi / Margot 2018-11-13)