Anfèt, si ou travay pa déklaré Si ou pèy pa Léta Out travay lé maron (konmkidi lé nwar)
Sa i mèt amwin sa, akoz i antèr (entérine) sak loblan lé bon !
Mé byin gété, déklarasyon groblan (kolon zavan sanm zordi) i pèy pa nwar-d'pyos, nwar-d'kwizine, nwar-d'sanm....!!
Wa di amwin lotan fine déviré Asé gaskonn zorèy (l'organe) domoun sanm la tay-bèf !!!!
Mé somanké lé pli lwin lokèr, somnanké saminn larasine..
Travay i vé dir ou na in konésans..
Travay i vé dir ou ginÿ kas tournan..
Travay i vé dir ou kab port manzé dann ni ou la fagoté pou fénésans
Travay lapa lèv sanm laklos
Travay lapa anpar sabouk
Travay lapa divizyon in goni (inn pou sak i trim, dé pou sak i tri)
Mé somanké dann péyi-la
Na domoun i konpran pa lavalèr travay lé nwar
Somanké dann péyi-la na domoun i pèy lalwa pou lanfimad bann maron anlèr piton
Sa lapa in zistwar, sa listwar mon péyi..
Latèr lé an révolisyon, na in larmé lasyans Pou kapar son bouzaron, son fonnkèr, son léspri
Tousala lé dann portfèy sétaki son kantité pou asté
Latèr lé an révolisyon, domoun an poundyak dann dézèr
Dann lamèr, kiswa Méditérané, kiswa Pasifik, kiswa Larényon
Latèr lé an révolisyon, mé na domoun i prétan rès kouyon.
(2019-09-03-Anfèt
Comments