Fonnkèr-Lanuit

I di lanuit la pa nwar Akoz pèrsone lé kab pinn lotan touléswar

I di lanuit lé nwar

Akoz solèy i tinn touléswar

Lanuit la pa ryink kan solèy i tonm, i di Lanuit sa kan ti-brine an bardnuit i lèv, wa di

Lanuit la pa solman in débaskil lo tan, i di Lanuit sa in rame zwazo, wa di An bouké pandiyé dann kèr bwanwar gansé, i di


Lanuit la pa zis in zafèr Grandyab Pou frison lapèr dann kré laravine

Lanuit sa in somin Bondyé dann in rin koko

In ronn i fil, koman salangane pou kontour lavi

Koman an piton-péyi, i plonz dann boranbor kèlyvavy Lanuit, sa in souplinÿ défwa

Lanuit, sa lèr pou zot ramas zot linz Pangar Loul-la i fofil langouti-la

Lanuit, sa lèr rann bitasyon-la son zorkri Bann Nyang i galop an kadak, san véli Akoz pyé-mang-la, sa gafourn « wapali » pou li

Lanuit sa in tablo i fas, in rèv i kine In maladi i pous, an filas Sa lamémwar in koulou sou boubou in zistwar Sa in brouyar dann silans nout rouli, an kabar Lanuit, sa in boulkèr kékfwa

Lanuit, sa doulèr i anpar nout kor

Kinmsa gro-solèy i pwak lonbraz nout zo

Lanuit, sa siro an mavouz i ansèr nout tèt Koman tizane-fanafout i pli fonnkèr-la an fardo

Lanuit, sa lèr mon lèv i ravaz Lèr mon léspri i sap, dann karo-blé lansan Sa lèr gob-la i souk mon kapkap dann in bal kadiké Lèr mon lâm i désot mon toupé Pou roul an zako dann milyé lakrwazé, pou mwin maziné Lanuit, sa in filé malouya, finvalé

I di, Lanuit, sa in gatir kadèr, in zin zamar

Pou ankos mon zingad sanm out falèz loswar Lanuit, sa in lanbrokin lizine, in zépïng léskine I farfouy mon zavan, mon tèrla, mon rasine

I di osi, lanuit, sa in bouké flèr larourout Dann lanbordir lakaz Kinmsa moulal an malout I di osi, lanuit, sa an foré fanal pou galiz larout

Pou anmarone gayar zolité nout vwayaz

Lanuit, sa in sonbli pou sàk na doulèr an vévé


Pou fini, i di Lanuit i lé kom li lé, i di Lanuit lé kom sakin i vé di, i di

Amwin m’i di

Lanuit sa in pöinm an roubi-lor In zardin zamalak sanm laproptaz losor

In trou féklèr pou sàk i ginÿ war ali In lansor-kador, pou sàk i nyabou lèv an li..



25 vues0 commentaire

Posts récents

Voir tout

Sitanksa