Kom ki diré..

Koman i lé vyé frèr ? In gayar laz pou ou zordi-la ! ! Ala ou là, dann out 63, i tonm plito byin, kom ki diré, akoz lé dé ansanm i di lo zour ou lé né, 9 dann lamèr pwason 🐠 kom ki diré !

Par syanba lo tan lé plito lour dopi kèk zour, pasito lapli i grinn, pasito somin lé baré, loto lé antasé, ou ginÿ pi fé lo viré-tourné kom ki fodré ! Domoun i konpran pa, akoz ou vyin pa, poukosa ou la pa ni, tout lo bistrak i antas kom ki diré..! Sanmsa, na touzour inn lé pa là, kiswa lafatig, rokomandasyon médsin, sansa yink-yink la souk azot.., sasfé tanzantan lamoral lé inpé largé kom ki diré; mé kosa wa fé, fo siport an tanpirkipé, la pa mwin sra kab amont aou koman fo fé !

Ou la koni, k’nout kamarad Rasta la monté (lapé pou li) ? Wè té !

Toutapinn 56 an, apinn lotan sort dann son malizé, anbarké sanm lamaladi bondyé.. Ankor in fwa, sé là k’mwin la rann amwin kont koman lotan lé kourt, koman li fofil an zéklèr, sé là, dovan lo tanponaz kapoté ké mwin la romazine, kosa nana pou fé, kosa la pankor fé, kosa i fodré fé.. !

Mé aou kom mwin, n’i koné ké maziné la pa angazé, n’i koné ké tanto sa pa in tan wa ginÿ méziré, si tan li lé longèr n’i vé.

Domin la pa si lwin kom ki diré, é si la pa domin nora in zour pou l’sirlandmin ;) !


I fé rir amwin, romazine nout bann takinaz si koman di « procrastination » an kréol, Gramoun Honoré la di : « mètpoudomin » ! Mé défwa pèrsone i koné pa sanm kosa lo domin lé tayé !!!


Mwin té pankor pran lotan koz aou mon p’ti-moun 🫃, na inn an pasé pou déza. Lo ti figir lé ron, an zolité ! M’i rakont pa ou koman son papa sanm son monmon lé fir, san koz dé mwin byin sir, an gaga wa di ! Mwin la di azot m’i vé l’i apèl amwin Granpèr, pa d’Papi pou gaskone amwin 🫢, ou koné amwin !

A wi, matant Zaza osi la monté (lapé pou li) ! Innot zarboutan kom ki diré, in fanm-fonnkèr la ras son vi sanm lavayans, san argrèt tout malizé son somin zinntan, in vré kador ! Domoun la ni fé gran lomaz pou li dann son kartyé laba, sanm in bonpé maloyèr pou port ali dopi son Panyandi ziska son Paradi !

Kom sakfwa, na in bonpé domoun la dékouv, sansa la rokonèt zot lamour pou li kom ki diré, antouka té gayar war koman péyi-la la ansèr ali an mazinasyon, an ron-kabar.


Lo trin i roul kom ki diré, i mèt anou sakinn son tour dann vagon dovan; Èk mon 57 astèr, m’i bèk si lapant amwin osi ! M’i sèy pa tro kalkil ali, pou pa maziné, mé tanzantan, kan m’i san lokor i grins, kan domoun m’i koné pa i kriy amwin « Tonton » dann somin, m’i pèrswa ké lo zimaz i kol pi sanm mon vizyon. Ou koné, lâm-la i vyéyi pa sa, kom ki diré.


Soman souvan m’i mazine, saminm laz ou la pran lélan, komsi san fé èkspré bondyé la manké ! Napwin l’bon laz kom ki diré, sakinn son lotorout, son rout an kornis, son somin Gran-Bwa, pèrsone i koné pa ousa tèrminis-la i lé !


Mé bon, n’i sar pa dor ladsi zordi, dopi lo tan nou la pa kozé kom ki diré, sa s’pouré na dot nafala pou nou partazé.


Mwin la vi Néninn napwin lontan, touzour sanm son gran sourir karkiyé ziska son zyé; nou la ginÿ koz in pé, rakont amwin son bann ti traka parsi-parla ! Lamasine Mémé té an pane dèrnyé kou, dikou mwin la tas manir trouv inn pou ranplasé, li té byin kontan, minm si in pé zéné, ou koné koman li lé ! Bon, bin wala pou zordi ! M’i roswèt aou in gayar lanivèrsèr mon frèr ! M’ bwar pi ditou lalkol, i fé plis k’inn an, é an plis mwin lé dann mwa karinm, dikou dé kou kom ki diré, mé m’a lèv mon vèr dolo aswar sizèr, sanm in priyèr, sora mon bouké flèr pou ou, kom ki diré mon frèr.

Nou artrouv anou. 🙏🏿



29 vues0 commentaire

Posts récents

Voir tout