top of page

Kozman Mémé (Fonnkèr)

Ala mon kor anfayi

Mon kor fani, i tranm an débor

Si fanzan piton-lavi, péyi m'i dor


Ala briyar-la, an fanal-fantézi

Laz an ti-brine, pou toy mon kador

Zigilaz dann kré laryaz mon véli


Ala mon kor anfébli

Zis an sézi, pou patat-konflor

An baba-tan, loul an roklor


Ala mon balan, tout mon kousi

An mouramour, pou fil an zékli

An zourazour, pou kas son rosor..


Ala mon kabar, mon yangine, mon foutor

Lo bout mon lélan, ti-zïng mon bouzi

Ala mon lâm, sansitiv i ploy dann vativyin van-zéni


Mé san tousala

Ala mwin là, zimaz an ravaz

Pou bal out kèr dann doulèr

Ala mwin là, ti-rir frizé

An koulèr lamalis pou zigil out bonèr

Ala mwin là, an sézon lafimé

An lodèr katrépis dann ti-briz out kaz

An lamour in monmon, in matant, in mémé

Ala mwin là, an sèr koté ou-la, fonnkèr an tousala.






14 vues0 commentaire

Posts récents

Voir tout

Commentaires


bottom of page