Langpozé

In pain lapa in pin, ni in lapin

Sakinn na son mi, son sèrkèy, son koko

Kiswa Larivir, Lamontay, sansa Laplinn


Dopin sora zamé lo pain

Akoz dézakor dobèr, sanm sindou..


Anplis, kinm son larzèr lé farlangé

Ou ginÿ-arpa di amwin sousou lé vilin

É fodré razout in H pou kayout son boté


Marséyé i ékri pa PING

Toulouzé i ékri pa PÈNG

Parizé i ékri pa PIN

Tout sé PAIN


Akoz ou vé m'i ékri ShouShou

Somanké ou vé kontinyé bat si out léstoma

Kan mon SÉ va koz an vré

Kan mon langpozé va poz an ZÉ


Lé vré, fo pa koz tort, pa koz an kaf !

Fo mèt lamoulir, pou sak pankor aprann !

Fo pa larg azot tro vitman !

Fo "kas in poz" konm di laromans !

Fo fé plézir !


Fo pa mèt tro malizé !

Fo galfat térin pou Kolon, sanm Béké

Fo rann sèrvis, rèt zénéré..


Tinn aou mon K

Ansinn mon W

Antèr mon Z

Fane out liv an lankan-malout

Anbar lavil mon fonnkèr

Sanm tout-sat mon bann frèr


Tir lonèr dann vant lasosyété-sasèr

..Kas konm ouvé

..Bril konm ouvé

Anbar tout mon bann piton

Bénono mon bann monmon

Lanspèk mon bann papa

Amar mon léspri koman kanot laminn aou-la

Vèy koman mon zèf i klo

Soman fé pangar

Domin aou minm Dodo.




4 vues0 commentaire

Posts récents

Voir tout