Langpozé

Dernière mise à jour : 13 janv. 2020

Aou.. Aou, mon kaloupilé fanm Mon bélouv, mon zarlor

Dolo larozé, mon mapou siké-kann Kayout tann pou mon kor malizé Koté ou lé m’i vé lévé, lèv an lansor


Amwin..

Amwin, koman doulé fanm

Si labrèz angizé lor

M’i friz pi, m’i tranm

M’i débord an siro, kolé séré M’i tonm, kor an kor, koté ou, an korakor..


Mé ousa ou lé fanm.. ?


Si lanbordir i rès amwin

M’i suiv somin mon lïng dékèr

Paradi mouramour

Ousa lonbraz i fé langi solèy


Mon lang vavang i rod

Koman gounifyol kabosé lamour

Dann kèl kontour oulé Si kèl kap out yangou fofilé

Kisa na lèr

Sou gafourne lé blan zétwal, m’i dor

Dann rin ranpar sou gro féklèr, m’i san lodèr lamèr, ti-srïng, brizan salé

Na l’van i koup amwin gaté, sabouk pou youl sa somanké


M’i kalkil bardzour, tibrine ankosté

M’i mazine Konbyin méné flèr nou la dépayé

Tousa karo mavouzé nou la désoté


Dann séon fouzèr tapkal, m’i mor Kisa i plèr, kisa la pèr

Dann bor basin la line i klèr M’i san lodèr kaskad, ti-srïng, brizan fané..


Mé ousa..

Ousa ou..

Ousa ou, ou lé..


Ousa ou, ou lé ..

Ousa ou..

Mé ousa..


Latèr i déboul Dann kré lovan, sou pyé d’kèr i farlang la lïng d’kap

Laline an foutan i vèy, karo fané, flèr ousa larlwa out kor

Roz i bouÿ an fé, koman kalou labrèz, pou blouz amwin for

Lamèr i savir Ral amwin là, an kala dann rin d’ravine Sara Pou kos, kosté sanm ou, zamalé lamour, blé an gob An zépis maoulé, m’i vé fane sanbon solèy, dann pilon k’sé ou

Losyèl i anpar Mon ronm an foutan dosèl, kalé, dann kré oulé M’i swiv kontour, santyé somin, m’i rod anparmi bouké Gérivit-la, pou lav mon lang i bav


M’i vé soubat ankor, tourné-viré, m’i vé roul ankor Dann out kèr piké, out kor saroyé, lansan douldoul Bénoun démavouzé M’i vé pléré, m’i vé ri, m’i vé déblouz sanm ou, saboul sanm ou


Mé ousa ou lé..

Ousa ou.. Ousa ou, ou lé..


Aou, mon fanm-pöinm Mon langpozé Mon fonnkèr anrosé Mon galé-blé


Lao, dann laforé M’i antan lorwa pou malouya out fonnkozé :

« Mon Péyi sé ou, tèr-tann démayé, sé ou m’i sant.

Latèr ousa mon bann zanar i dor, latèr vavangèr-bondyé té fir,

Sak koté tout out piton, sone aou astèr laklos lalibèrté ! »


Mé ousa ou lé..

Ousa ou..

Ousa ou, ou lé..

 

"Mon pays c'est toi, douce terre de liberté,c'est toi que je chante.

Terre où sont morts mes pères, terre dont les pèlerins étaient fiers,

que du flancs de chacune de tes montagnes, sonne la cloche de la liberté! »

(Martin Luther king - Lao-2015-11-07-Pöinmizasyon)

 





31 vues0 commentaire

Posts récents

Voir tout

Sitanksa