"M'i voudré pa kiné"

M’i voudré pa kiné

San ginÿ lo tan konèt

Bann syin-nwar mon péyi

Bann i dor san révé

Kaliko ki-touni

Goulapya pou golèt

Bann bibi bib-larzan

Lo ni garni yangine


M’i voudré pa kiné

San konèt si laline

Sanm son fozèr kapline

Na in nay an toupi

Si solèy-la lé fré

Si so kat-sézon-la

An pou-d’bon zot lé kat

San konèt kwékilé

Défilé dann in rob Si trotwar gran boulvar

San louksir in rogar

Dann in rogar légou

San lo tan mèt mon zob

Dann s’fant kwinstro bizar


M’i voudré pa fini

San konèt lalèp-la

Sansa sèt maladi

I souk aou laba

Lo bon ni lo mové

I fré pa mwin lapinn

Wi wi wi m’i koné K’m’i sar ginÿ son dévinn

Épisa n’a pou sir

Tout sâk mwin m’i koné

Tout sâk m’i aprési

Pou-d’vré i ral amwin

Sa fon vèr-blé lamèr

Sanm flèr-limon i ronn

Si lasab angansé

Zèrb an fé sou novanm

Latèr an vinn rouvèr

Lodèr tamarin-vèr

Sa béko-lor manmzèl

An sési an séla

Zoli kafrine lé là

Mon fouké, mon zwazèl M’i voudré pa kiné San ginÿ lo tan izé

Iz son bous sanm mon bous

Son kor-dou sanm mon min

Lo rès sanm mon ron d’zyé

M’i di pa plis fo byin

Tasmanir tir réspé


M’i voudré pa lamor

Avan’k sra fine vré

Bouton roz-zétèrnèl

In zour plin sanm dé zèr

Lamèr si lamontay

Lamontay si lamèr

Lafin pou ladoulèr

Bann zournal an koulèr

Tout zazak byin kontan

Plin d’nafala i dor

An poundyak dann koko

Bann kador zinzényèr

Bann zardinyé zwayé

Bann sosyalis ansousyé

Zandsité zirbanisté

Mazinèr an fézèr

Sitan’d zafèr pou war

Pou war sansa antann

Sitan lo tan pou pran

Pou rodé dann fénwar

É là m’i wa lafin

I angrouy i déboul

Sanm son gèl masikrok

Son dé bra gran rouvèr

An krapo-la bankal


M’i voudré pa kiné

Non mésyé non madame

San ginÿ lo tan taté L’gou i zigil an mwin

Lo gou sàk lé pli for


M’i voudré pa kiné

San ginÿ lo tan gouté

So lasavèr lamor…


Je voudrais pas crever-Boris Vian (1952) Langpozé-la-Lao Vanglao (2013)








10 vues1 commentaire

Posts récents

Voir tout

Lalïng

Akoz