top of page

Mon Frèr

Lé ryink sizèr, laklos Ladélivrans i vyinn soné

So matin ankor, lo kor-la la pi bézwin somèy

M’i lèv, koko-la ranpli souvnans Déor lé an ti-brine, sanm inm-ti frison lovan, i glis..

Kom pou andousi zour-la, kom pou anbéli ali.


Mon zorèy i prèt, dann babiyaz ti-zwazo, kouti, martin mayé

Sakinn son romans, son séga, son kadriy

Sakinn pou anons bo-tan, si son brans lasité

Sakinn pou rakont zot rèv dawar..

Sansa pou sant lamour, somanké.


Lo brwi lamèr la fine koulé astèr

Apinn mon malol dékolé

Toutapinn mon vèr d’lo anvalé

Sanm sitan loto, inn déryèr lot, kom an zouwé..

Pou fil dann filé louvraz, pou trikot zot zourné !


Parsi-parla, na in kaniki pou rod tété, sanm son pléré-pouléré

Parlaba, na sàk pou margonÿé, pou sakouy bann zazak ankokiyé

Sansa, sàk fine alime télé, sàk pou fé koul kafé, sàk pou maziné Dann mon dékoltaz lanuit, amwin, mon lang lé an lanvi d’kozé..

Kom i di, sakinn son viré-tourné, sakinn son manigansé.


Sètané, na dé karinm i krwaz, Pâk sanm Ramadan Lé dé in somin pou fé lèv nout kor, pou fé grandi nout lâm

Ou koné, dopi in bout-tan, mwin la pran lélan, ti-dousman

Pou « kas in poz » kom di mon dalon anlouné..

Pou délas mon barik kom ki diré, pou viv mon lot sosyété.


Avan yèr swar, mwin la ginÿ in tan pour alé war mon bann fifiy

Fransman di aou, lé an zolité, an kadom pou fann mon kèr

Fo war, roflé zot zyé, zot zwayèsté, koman lé an boté

Lo pli gran fine komans byin kozé, kinm i mas ankor inpé..

Mé son « gwanpèr », dann dé ti-bra lévé, i fé déboul mon fonnkèr.


Sakfwa m’i sèr azot for, m’i mazine bonèr ou navé, poudvré

Koman solèy té i briy dann out zyé, pou koz amwin lo ti-toupé Zinyor

Mwin lé sitan kontan pou ou, out dézyinm ti-moun i viynn arivé, zarlor

Nou la pankor vi dopré, mé si portré, son né Gaélou, son zyé bridé, son rir békoté..

Wa di in bonbon-lamour, in bouké kadoré si lamin Bondyé !


Konpliman pou ou mon Frèr.., sanm tousa bonèr Eren pou zot kèr !


Astèr witèr la pa lwin

Tardpa fodra m’i rant dann vouv amwin si

Lotan bényé, sanzé, travèrsé pou béké Travay i lèv pa tousèl kom i di, fo souk ali..

Ankor détrwa zané askiparé, pou anpilé, avan réspiré, si Bondyé na pityé !


Aprémidi, na sèr inpé lo frin, akoz Vandrodi-Sin

Mé domin fodra tyinbo lo rin, ou koné koman domoun i sézi anou dann sézon-la

Anplis késa, ou koné koman i lé, nora touzour in lanbabra

Kisa i vyin, kisa i vyin pa….

Inm-ti kou-d’laryaz pou ansèv ralonz wikinn-la !


Dikou, m’i anbras aou mon Frèr

An kalou dann kou, an boubou si zénou, an sousou dan labou

Bliy pa, n’i mazine aou for, for minm, kinmsa syanba-syanö

Épisa, kom di Matant, m’i glis dann out zorèy, sanm sàk Monmon-Papa

Nou la fine fé lo swa, parkoté mwa-doktob, nora lalyans si not dwa !


M’i swèt aou in gayar lanivèrsèr pou tanto-la, dann paradi lao oulé !


2023-04-07-Mon Frèr-Lao










30 vues0 commentaire

Posts récents

Voir tout

Prière

Comments


bottom of page