Promyé-mé
Dernière mise à jour : 13 janv. 2020
Kèl promyé-mé ?
In tryang rouz si léstoma
In flèr pöinm si bor-d’kèr
In brin-migé, akoz pa..
Kèl promyé-mé ?
In soubatman kont kolon
In larasman pou sépar lotan
In tan bitasyon, in tan loli, in tan salon..
Kèl promyé-mé ?
Koman in rolizyon sindiké
Pou rovandikasyon blaké
Sakinn son bann dann mardi-gré..
Kèl promyé-mé ?
Pou kour karté dérèyr kadi krwazé
Akoz lasominn la fini yèr
Pou anbar larout dann bouké lafimé..
Kèl promyé-mé ?
Dann in péyi défalké travay
Dann in sosyété zonbrilizé
Dann in ron toupi dépotolé son nay
Kèl promyé-mé ?