Somin Lanwit


La mémoire est un véhicule, un espace de vie, un tableau qui s’efface, un rêve qui s’éloigne, une utopie qui brûle, une maladie qui s’installe, La mémoire est un corps qui voyage au centre de l’esprit..

Ousa ou vé m’i sava

Ou wa pa koman mon kor i larg apré sizèr, koman tibrine i souk amwin dann lèr solèy i tonm

Ousa ou vé m’i sava

Pa plilwin mon koko i ginÿ aminn amwin foutor, pa plilwin lakrwazé, tèrlaba

Ousa fo m’i domann syouplé pou démay lobout

Pa plilwin késa, ousa mon lâm an vavang i travèrs, i kas kontour, sansa i kontourne

Ousa lafièv dann mon koko i souk, i amar mon léstoma, i fé lèv mon kèr boranbor

Ousa tanpirkipé laklos la i sone, i rézone, i gaskone Lodyab sanm Bondyé

Ousa na ryink losyèl, dann gro-fénwar, ryink amwin, zamérant i rod dann kré somin lanwit, sépa ousa

Ousa ou vé m’i sava, si lapa laba dann mon koko divagé (Folie douce)

Kosa ou vé m’i rod

Ou wa pa koman lovan i di kan li souf dann mon kré zorèy, alé..

Rod ali, rod, fo m’i rod, mé rod ousa, kikoté rodé kan m’i koné pa somin mon mémwar

Na zis inn minm m’i pèrswa, kan fénwar i vyin, kan kapkap i trap amwin

Kan lapèr i sézi mon pyédkèr sèk si goni ranpli rouli lamour

Na zis inn m’i krwa, sora kapab amont amwin santyé i fil lotkoté laba

Fo m’i trouv ali péyi la, fo m’i trouv son lodèr, fo m’i kap son fonnkèr

So gran péyi Momon sanm Papa, ousa Dada té i bat tanbour

Ousa Néninn Makoro té i gatir mon sévé sou pyédbwa

Kosa ou vé m’i rod, si lapa sa, mon santyé kalikoté (Liberté)

Koman ou vé m’i fé

Mwin lé fatigé siflé, rouspété, pléré, di mwin lé obout, mwin lé rinté

M’i vé pi koul koman bato fou lapèrd son kordon lavi dann vag labriz

Swiv ranpar souvnans, tri kotri-mavouz, sanm kodi-margot

M’i vé fane zétwal dann syèl, pou tras in zapèl, fouy bonkoté lanvèr

M’i vé toy gafourn piton, lalïng-dékrèt, basin trou-d’fèr

Zigil ravine lalang mouramour, loron batèr, ousa bourant i may soulang

M’i vé filé, fofilé, démayé, m’i vé détaké, vol koté ou, vwayaz sanm ou, akoz

Mwin lé fatigé rèt koman larozwar siro pou karo piman

Kosa ou vé m’i fé, si lapa tras in lïng pou mwin maroné (Marronnage)

Ousa ou vé m’i sava

M’a parèy in fèrpar koulé dann bwatolèt gardyin lamour la pèrd laklé

In karo mayi pou mèrl-Moris, in bouzaron lapay san favèr

Ousa ou vé m’i sava, mwin lé la, laminm

Ousa mon lank papang i vol somin lanwit si lapant Gran-Brilé

Konm an bourkantèr mo-dou, tizanèr léspri pou vèy si mové-zèrb

Konm an gounifyol i lèv balo lorèv si son zépol dopi bardzour

Ousa ou vé m’i sava, m’i lé la, asiz an gro pléré lotèr dovan mon bann mo-doulèr

Kosa ou vé m’i fé sanm tousala kétfwa

Kit amwin, kit amwin alé ankor…, kit amwin figé (Fugue)

(2017-04-06-BG-Somin Lanwit)


#Maloya #Pöinm #DoKreIS

2 vues0 commentaire

Posts récents

Voir tout