I fi t’in tan dann péyi-la
In tan lontan, in tan zavan
Ousa zanfan té i né dann li papa
Ti-baba tann, kaniki minm, kosté dann kwin lo li-kour-pa, té i zwé pa
Solman, bor an bor, lo dé kanèt té i vèy o-ron
Té i aspèr tété momon
I fi t’in tan dann péyi-la, lo tan lontan, lo tan zavan
Ousa bourèr dann rin lagal té fé lo rwa
Fanm-la té i vèy lo swar rantré, té i aspèr, té i atann, sitan trakasé
Té i koz pi
Si tantèlman lo kor, koman boul dori, té rèd an zékli
Forstan langi
Dada, fé rant touzour pyé flèr
É amar lo syin, tansyon pangar..
Sa té in tan, dann lakaz-la, lo tan bonbon té lo tan bèzman
Bokal brikrinm té i étinn pa, akoz gro-lou, ti-loto-rouz
Akoz Tizan, Grandyab, akoz Kala, akoz tousa… !
Réspir pa for…, fé pa dézord !
Dada, ral byin lakord po kal laport in !!
Sa té lo tan n’i té dor pa
Zanfan aou, fanm aou, tik-tak révèy
Té i bat tanbour, dann fon zorèy, sakinn zot tour
In tan ousa bardzour laline té i kart labrine, po alim sandèl dann fon lakour
In tan, sépa, konm koméla
Sépa koman, zé n’sé kélèr, fonnkèr fanm-la konmsik té i plèr
Mondyé-Sényèr, kwékilé sa ?
Akoz tarzan i-irl konmsa ?
Dada, vyin vit, alim lo far, vyin sanm momon, vyin, nou valé war
Sa té lo tan
Lo tan fin d’mwa
Doulèr té i dans dann kor boug-la
In tan margoz, in tan zéklèr
In tan gramoun té i wa pi klèr
In tan mandoz, ou l’zonm té fyèr
In tan konÿman, in tan mizèr
Zanfan konm fanm, bononm té i plèr.
(BG-Fonnkèr Zanfan -1994-01-01-Margot 2010/2018)
Pou di azot konmsa : Souvnans-la i rès pou nou, zazakèl zot lamour, koman véli, fanal, bélouv lavi.. !
Pou di azot mèrsi, tousa bonèr zot la fé lèv an kapilèr dann fanzan Sinn-Ni sanm Salazi.. !
Pou di azot ankor, ni yinm azot, ankor plis zordi !
