Navé lakour, latèr partou
Dann tout lalé, navé migé
Navé lindigo, yapana, sitronèl an bouké Dovan lo pyè, dovan lo zyé, té an karo
Navé kadok, navé larou
Dann bal dori, lakok pou tiré Dann park-poul dozèf pou gobé Navé pokpok, kamaléon, navé zwazo
Navé sintir, savat, karoutsou Pou fé drès bwadrin malfondé
Navé pin-sorb, sanm dosik si sindou
Navé siro dann gigoz, sikrédoz, sanm boudou
Navé filao, lalé sipré, fouzèr-banbou Laklos pou maziné, pangar bondyé
Navé Lapos pou désagrine aou Sanm in katsou Lakès, sikèt an kado
Navé lamontrèr, konésèr, profésèr Lo vant o-ron, lamin byin lour
Navé lansan, laforé kondané dématé
Navé zéyé-mazanbron, kanal pangar loto
Navé Siltan, navé Dog, navé Tarzan
Navé Lila, navé Pyondinn, navé zanfan
Navé Mémé, navé Pépé, navé pliyan
Navé dada, navé néninn, navé sitan, sitan
Navé lo zonm, farlangé sou fardo
Navé fanm, anpilé sou balo
Navé lamour, anvouvé dann labou
Navé laraz, anromé dann gabyo
Navé bouzaron anlouvé sanm lovèr
Boubouté sou lapo, an bourèr
Dispansèr po dolé, po pézé-méziré
Profilaksi po DTT, kilot-Larès pou Tino
Navé sitan, sitantèlman..
Navé domoun, domou partou
Dovan pèyi-là, dovan lalwa, dovan zilo
Navé soulangèr dann lakrwazé
Navé travayèr antasé, an défilé moringèr
Navé léspwar dovan kolon, dovan drapo
Navé galé, navé labonm, lafimé partou
Dann zyé zazak, koko litèr
Navé tiyo dolo, pou défalk lamizèr
Navé dofé, dofé partou
Navé loto, bordé, saviré, brilé
Dovan férouz, dovan Karnèr, dovan baro Navé nèrvi Débré, kador Legros, kaliko-kazou
Épisa..
Navé lapèr, navé mantèr, navé profitèr
Navé zinvéstisèr, navé zinzényèr, navé kaparèr
Navé zimaz an réklame, ki-touni an rébane
Navé kazino pou zozo, kinzinn à gogo
Épisa Na sitanksa..
