Lao Vanglao
24 sept. 20221 Min
Lamèr
In ravine an zonbilik dan rin latèr-la, somanké
In somin d’lïng-dékrwa pou zanklavé débarké
In somin démalizé pou maronèr anbarké
In basin lavi, in ronn lamor, in landrwa pou désoté
Lamèr
In sintir pou anbar lo rèv moun-la, somanké
In santyé galé pou mont si lakot
In ranpar kanté pou anbarikad azot
In balo lapèr dann koko sa moun-la, anmaré somanké
Lamèr
Zis in léspwar somanké
Blé koman lo syèl
Kinm an dézèspwar somanké
Nwar koman lamélas dann gro fénwar
Lamèr
In tras lalang zot sosyété somanké
Fagoté dann rin siyon-trimo
Dann rouli zot bitasyon, la-o
In gonblo an débor, sanm lank zot bato
Lamèr
In souvnans an katimini
Dann kor sa Moun-la
In soufrans an pagot dann kèr Djahara-la(1)
Ousa lapli pou fyak son vi dopi Ouani(2)
Lamèr, in soz, in zafèr
Ousa, noré bonpé pou di, kom ki di
Mè pou zot-la, kosa i lé lamèr-la ?
In ponso, in pasrèl, in tranplin
In lïng zamérant dann kavo
In rèvman, in kèr lib dann lo
In batar monmon pou zanfan i plèr
In batar linivèr pou moun an galèr ?
Pou zot-la, kosa i lé lamèr-la ?
Koman zot va di lamèr-la zot la pou nwayé si latèr-la ?
Koman zot va di latèr-la zot la pou antèr azot dann lamèr-la ? (3)
1 Djahara : Histoire contée d’une traversée
2 Ouani : https://www.francetvinfo.fr/monde/afrique/comores/comores-ouani-nouveau-port-international-pour-les-clandestins-vers-mayotte_3115249.html
3 Extrait de "Anval Lamèr" - Cie Lolita Monga