Bal Kodi

In zour péyi dé sézon, fodra k’m'i vyin désine aou !

Èk lakoulèr lo van…

In zour fodra k’m'i pinn aou,

Koman mon zyé li gèt aou, koman mon kèr li louk aou !

In zour ranpar loséan…

Fodra k’m'i vyin ékri aou !

Èk lasann gri volkan, fodra k’m'i ésèy di aou,

Koman mon larm i koul pou ou, koman…

Mon pwin, i soubat pou ou !

Sa kinm nora mové tan, kinm…

Ni s’ra riyink nout dé ou !

In zour m'a kri pou toulbon :

-« Woté Larényon mon doudou ! »

Koman mon kor li kwarèl aou, mon rèv i yinm…

Ni yanmièl aou !

É pi m'a fane filao,

Pou’k i avine[2] lao,

Anlèr si Maïdo, m'a tay gafourn[3] pou zwazo…,

M'a verni lavi,

Konm fèy banane sou dori,

M'a dans sanm kodi dann kotri[4] Manapani,

M'a très an bwa-d’fèr,

In lantouraz pou bor-d’mèr,

M'a ravine a bonèr, pou rins aou tou l’mizèr ! ! !

---

 [1] Kodi : N. m. (Paviyon, Nargoulam) Mât fixé sur un bloc de pierre devant les temples indiens au sommet duquel est fixé le pavillon (petit drapeau).     [2] Avine : V. tr. Rendre bon ( a propos des marmites et des casserolles).     [3] Gafourn : N. m. Coin perdu ; trou.     [4] Kotri : coterie : N.f. (anc. fr. cotier, association de paysans). / Péj. Petit groupe de personnes qui soutiennent ensemble leurs intérêts.