Somin Laravine

Somin laravine

Somin ousa galé i roul, ousa dolo i déboul

Ala somin ousa mon larm lokor i débord Somin ousa lo san mon lâm i koul

Somin laravine, somin lanuit

Ousa fénwar i souk lo van dann son fil bib

Bib kom an bébèt mon pyé péyi-bé

Koman latras solèy, rouz an latèr mon zonbri

Somin laravine

Ousa m’i san lodèr lasours, lodèr Zanahary

Ousa lonbraz bwanwar i tyinbo lamin zamérant

Ousa fouké la souk gafourn lo ros dann Bémasoun

Somin laravine, ousa m’i kour si lakot

Ousa m’i kontour lamor

Ousa m’i kas kontour lavi

Somin laravine ousa m’i plant mon lansor, antsoro-kador

Somin laravine

Ousa mon kèr i gonf, an volkan, an roulèr Sakfwa in débouli Bondyé té bar mon somin

Sakfwa lagèl fizi-la té aboy dann santyé mon zorèy

Somin laravine, somin mon nasyon blé

Gonblo ranpli dolé-lamour

Bèrtèl ranpli domyèl laforé

Goni ranpli bardzour, lovant ranpli kély, zazak an véli

Somin laravine

Lariyèl Pitsana-tyay dann son kanot an karos

Somin laravine

Koulwar Misar-Misayé, zangiy lorwa dann vouv mon libèrté

M’i gèt aou zordi, sèk an zarèt Kolonizé sanm lyane patat, lyane i dor, lyane i touf..

M’i gèt aou zordi, somin laravine

Koman somin la pèrd labann.., labann mon zistwar..