Pöinm pou nou
Ala kèl zour nou lé zordi-la
Amwin, sanm mon tas kafé, n’i mazine
Kom toulézan m’i mazine, dann silans solèy i lèv
Dann kontantman kouti si bor zardin
Ousa m’i mèt dolo pandiyé..
Tan-la i fil, an zimaz tèrla
Parmi sa, mon kèr i bat, i sagrine
Kom toulézan, m’i mazine, ziskan débordman mon lèv
Kantité zétwal dann syèl, sitan lwin
Na Bondyé i dor là, lot koté..
Zordi-la, sa vandrodi trèz
Sa nout granzour ladyé, nout zour pou kozé
Kisrès an vavit, kisrès kinm in grin
Kom di ou minm, mon filozofèr an dada-bé
La pa kantité fénwar i fé laboté in rèv..
Zordi-la, na sitan lo tan ranpli ti-brine
Sitan lamour ousa dézord i pèz
Anon fé sa mon frèr, so vandrodi trèz-la
Afane lasann i ankokine, tiz tizik dobwa nout kèr
Anon sanm son lardèr, fé arflanm tousa bouké labrèz..



Commentaires