Salimina-la

« Plèr ti-madame, fodra aprann fé avèk

Doulèr in momon, kan fatalité-la i may

Pétèt in zanfan, pétèt in mari

In kamarad, in famiy.. » (B. Salimina)

Alala, ala li là, lèr-la, lèr la soné lao

Lèr la n’i souk out kèr, dann bwa-poème out kor

Out kor té i vé ankor, ankor lamour, ankor viv, ankor Reviv

Kom an roulèr lamizik té i bat for, dann malouya out lâm

Kom an pikèr an zakor dann Blouz-Cité-la, Ghéto Ravan’


Yo, mon kamarad, mon zimaz, mon roflé

Mon dalon kozé, an kozé-bouzé

Dann in bato san rame, nou la navigé

Si in mèr san vag, nou la lès alé, nout somin vavangé Pou trouv in limir, in spot-vèr pou klèr santyé nout kèr


In solèy rouz, kom an flanbwayan

In solèy blé, blé kom an léspwar

In solèy lévan, kom an loséan

In solèy blan, libèrté-la dovan


Té kosa out vi Dada

Dann kèr Sodron laba, vilaz péyi-la

In fonnkézèr-mésazé somanké

In parolèr-vavangèr dann lafimé sèk-o-pyé


In laryaz lotrin dann rin kabosé, in zin lakréoli

In brin zétwal fofilé, touzour tro o, zamé tro pré

In tam-tam, an Kumba-Moloïzé, in son Lafrik, in son isi

In romans lavi dann ron Ti-Rozé


Té kosa out somin Bernard, out lïng an fouké

In morso galé rasé dann kré volkan domounité

In ros lalav, pitaklé lamour, in gonblo laraz fané si roulo lasosyété

In drapo lalibèrté, in moun an kodi dann lakrwazé


In tourbiyon zamalé, dann mon vintan ramasé

In Kanyar-Lakour anlèr podyom, angazé

In lonbraz lamour, an véli, dann kèr gansé

In Korbo bagoulé, dann in lavalas somanké


Té kosa out kri lavérité Salimina-bé

In fanal si bobès lalanp, an mo-lor kadansé

In papiyon lafré, dann van laforé

In zanfan-gaté pou bann momon ou navé


In papa-lansor doubout dann son karo malizé

In granpèr-Kador pou sourir son zazak, ti-kely lé né

In somin pavé, dann syèl mon souvnans, tèlkilé

In zarlor malouya, dann larivir, sou pyé-soka, koté ou lé


Wi, Out pli zoli poème, té out santiman

Si ou té apèl Verlaine, ou la di

Ou noré ékri sanm lank out sân

Tousa lo mo n’i yinm, an badri lavi

Kinmsa doulèr lamour, sabouk lo tan


Astèr, zordi-la San fé dézord, san lamayaz, an misouk

Ou la larg tout, ou la profèr kit larout

Kinmsa lé vré out kor i dor, n’i koné léspri-la lé pli for

Non, ou lé pa mor, non ou lé pa mor..


Gèt anou là astèr, pou sant nout priyèr

Pou fé tonm lapli, pou aroz latèr Sanm in pé lo rèv, inm-ti zistwar, pou arfé bat out kèr Pou di dé-p’ti kozé ki di, an badinaz lavi


Gèt anou là pou sant an gro-pléré

Ou té léspwar, ou té yinm viv

Zordi ou sava, domin nou ariv

Ou té in kèr té i bat tro for

Té i bat pou nou n’i té inyor


Ou té in sékré, té falé pa di Zordi domoun i rakont out vi

Ou lé lamour lé zamé mor

Domin n’a yinm aou ankor pli for.. Dor aou byin, mon Néninn idi

Lès anou, lès amwin mazine aou Sanm nout kèr lé gro, ziska domin

Ziska pli lwin..

(2022-07-24-Salimina-la)

Poème hommage à Bernard Salimina, Auteur et musicien du groupe Ravan'.





128 vues0 commentaire

Posts récents

Voir tout