Écrit en juin 1988 (modifié en 2006)Ce poème se fait "paroles de sans-abris". Dadou s'exprime à voix haute, Sizèl et Fwafwa répondent silencieusement...

Dadou :Si mwin lé konm, konm izé

Si mon léspri po divagé

Lès amwin là, laminm

Sanm lamour-la, kaskasé..

Sa bal-la, sa mon kozé     

Bil, i aprop fonnkézé

Sàk aou, sàk ali, sàk amwin..

Mon gaté, kik i lé tiktik anbor

I anpar lanwit, i kont lo zour ?

Sizèl :Sa Karousèl oki, sa mon kor !

Tanto Sinn-Ni, tanto Lo-Por !

Sa fine dor dann lapousir

Dann vant labou, dann kwin malèr

Kanminm sa, li lèv an pyé fouzèr ! 

Fwafwa :Tourné-viré, viré-tourné..

Fonzon i bwar tout sa'k m'i plèr !

Dadou :

Mon gaté, kouk i lé, kriké !

Soubik an nik, kraké !

Sizèl :

Sa l’ki marmit galfaté, sa mon kor !

Tanto zako, tanto zakor !

Sa i tyinbo dobout,  i tyinbo ankor

Po gèt santim na lo gou lor !

Fwafwa :

Kit-tabwèt !

Fèytol solèy angiz lamour ?

Dann mon vant vid lavi lé lour !

Sizèl :

Sa fine manz tanbav latèr

Patat dolo, galé lamèr,

Sa la bwar lo zi amèr,

Transpirasyon, binÿman lokèr !

Fwafwa :

Souké largé ?  Souk-souké !

Dadou :

Kinm kaskasé, pliyé an dé

M’a kontinyé, rod in riyèl pou nou sové

Rod in siyèl pou nou déliré..

Mé konbyin somin, konbyin détour 

Zot va trapé sakinn zot tour ?

In gine réspé, takon d’foutor... 

Na fout pi d’plas ou k’zot i dor !!!

Toutfason n’a gardyin déor

S’gran kaz, ou’k kourandèr lé for !

N’a vèy azot tyinbo lamour

Dann gétali, si l’bor lakour..

Épisa, afors dor dann lapousir

Dann vant labou, dann kwin malèr

N’a lèv konm zot fouzèr

Fonzon i pous, pou mont anlèr !

Sizèl :

Épisa, afors manz tanbav latèr

Patat dolo, galé lamèr

N’a flétri konm kapilèr

Dolo pa niyabou mouy lo kèr !

Fwafwa :

Siko kolé, koko sikré..., M’man-Sizèl, kélèr ilé ?

B. GRONDIN  

(1988-06-01/Margot 2006-06-14)

#lao #Fonnkèr #pöinm