Dann bout lamèr laba, piton mon péyi i lèv dann syèl Son ranpar, blé koman volkan, i fyont sanm payanké Papang, fouké, i tras dann brouyar boukar, dann van-sirwa, i fofil dann lanbéli bondyé
Dann bout Loséan d'Linn laba, domoun mon péyi i lèv dann bardzour Son lang, blé koman lamour, i fanafout maloya monmon sanm papa I bat kabar dann karo kann, i fane tani pou Zanar
Dobout si gran-brilé, paviyon véli dann kré labriz
M'i vèy zingad i port mon zistwar, kiswa fagoté, sansa vérité Lokèr i gonf ankor dann roulo salé-la, akoz napwin lotan pou fas tablo-la
Dobout dann gran lalé, lavane ranpli louvraz, m'i très lalïng mon kor Sanm tousa kordon zonbri la désot lobor, koman toupi i ronf
M'i dans dann ron kador, garoté dann tapi-mandyan, sak morso latèr-la mon kèr.
