Laba, dolo blé-la Wa di sa kouvèrt-bé pou lokor Dopi là, ziska bor-bardsyèl Sitantèlman anbalaba Wa di li dor Wa di lé dé in sèl
Tanzantan, wa di li friz Somanké lovan pou anfougad ali Sansa, wa di Dann basin koray In rame sardine pou loukasyèt Dovan filé kaparèr
Par koté mwin, lovan Koman tapi-mandyan loson Tout an pyoukman Gazouyaz dann kèr laforé Wa di in komansman lapé In silans dovan Bondyé
M’i vèy, koman solèy i amas Koman losyèl i tas M’i gèt taxi pou mont an fouké Oh zilo-zilo, zilo Laport déor-la lé gran-rouvèr Kinmsa lanbrin, kinmsa lanprin
Latèr-la lé vèr, wa di Na léspri i dans dann bout filao Wa di, na bal dann kèr zavoka Maron konman li lé Wa di, lavil-la la tinn son simagré La fane son vilinnté
Tout lé dos, koman rèv lanuit Tout lé an bouké séré Wa di, sa romans Zazalé-Vavangèr Wa di, Sa fonnkèr Tanbi-Parabolèr M’i vèy tousala-la M’i plèr..
(2020-01-07-Wadi)
