Lil Eva

Promyé bardzour

Fé pèt mon zyé

Vyin trap mon kor doulé dann dra lafré

Vyin sokouy mon lèv, lé mov an fièv, an douldoul blé

Aminn amwin lwin

Lwin, lwin minm


Lao, koté lamour

M’i vé artourné, pou gèt aou flanbé

Pou war koman ou fane badri dann bal lanuit

Pou fantézi Lilèt

Aminn amwin lwin

Lwin, lwin minm


Kri pa brouyar, out dame-donèr

Lé pli yango war aou rouvèr

Kom sansitiv dann rob kortèz

An faam béni dann bin likèr

Aminn amwin lwin

Lwin, lwin minm


Anon fé vit, tonsyon pangar, Martin, Fouké, Tèk-tèk, Bélyé…

Tout kavalyé i kour sou kavadi Bondyé

Akoz kadri bann mousavèr, vyolèr lotan

Akoz kotri lélikoptèr, krévèr volkan

Aminn amwin lwin

Lwin, lwin minm


Ma suiv aou dann zanbavil Dann lyane-oror

Pou v’ni louksir out kor mafane

Ma suiv aou ziska kèr d’Lil Dann boranbor

Po v’ni soupir kayout out zame


Promyé bardzour

Promyé lévé

Fé pèt mon zyé, fé pèt mon kozé

Fé pèt galé pou fé santyé

Fé pèt gafourn lé malizé, fé pèt an flèr péyi lémé

Fé pèt lanuit pou arkomansé




8 vues0 commentaire

Posts récents

Voir tout